再見糖糖

今朝一早, 我阿媽打電話俾我 ... 糖糖走了!!!

升中二前o既暑假, o向我死纏o既情況下, 屋企人終於問同事買o左仔狗仔返o黎, 一隻白色西施mix魔天使 ... 佢就係糖糖!!! 買返o黎時, 糖糖大約一歲幾啦 (佢前主人都唔係好Sure), 好活潑, 好貪玩, 不過, 每日都總會哀喚一兩分鐘, o個時以為佢悶, 好快就買埋甜甜返o黎, 希望有個伴冇咁悶 ...

正當我o地諗緊同佢o地做絕育手術o既時候, 甜甜已經大肚了! 一生生o左 Apple, Bennet, Cherry, Durian & 一隻幾日就么折了!!! 我仲記得o向甜甜生o既時候, 糖糖好緊張, 又唔敢埋去, 個樣好擔心又好八封咁, 真係好得意!!! 呢個老豆都係傻更更o架喇!!!

有次同糖糖佢o地落去公園玩, 糖糖唔知死走去同D大狗打架, 俾隻大狗打到隻眼受傷, 攪o左一排, 都係要切走一隻眼~ 做隻獨眼狗!!!

不知不覺間, 已經13年喇, 糖糖近幾個月身體好差, 心臟唔好, 個腎唔好, 幾次於生死邊緣, 媽媽仲擔心佢返唔到西貢 (o岩o岩搬返去)!!! 早兩日同埋老婆返去, 順便探下Bennet同埋糖糖, 見佢都OK精神, 都有同佢玩下, 錫下佢, 我o地走都仲有走出o黎送我o地! 真係估唔到會咁突然 ... 今日, 佢終於都離開o左我o地!!! 唔知係咪尋晚個天已經想Alert我o地呢? 成晚行雷閃電 ... 今朝起身, 收到媽媽的電話, 知道糖糖o既去世 ... 個心好淡然, 見佢辛苦o左好多日, 一日比一日瘦弱, 都知會有咁o既一日~~~

今朝天色幾好, 雖然都多雲, 不過太陽都總算出返o黎!!! 可能係糖糖想借個天同我o地講, 佢已經得到解脫, 叫我o地唔駛為佢而傷心?! ... 糖糖, My Good Boy!!!